YÈN WUS TEKAN WANCINÉ

(Gurit marang Adhiku)

Adhi

Coba sawangen

Kabèh kang ana iki datan langgeng

Sadaya bakal musna

Mung angantu titi mangsané

Adhi

Wusnya ginaris ing pesthi

Aku pinanggya lawan sliramu

Seneng, resep, anyep, ayem angebeki kalbu

Iku mau tan ana liya kajaba ya wus katekan ing mangsané

Adhi

Yèn ta mengko uga wus katekan ing mangsané

Awaké dhéwé uga bakal pinisahaké malih

Rasa seneng, ayem, tentrem kang saiki ana

Bésuké bakal dadya seratan ing lembaraning Maha Kitab

Déné awaké dhéwé iki banjur bakal diujuraké mangalor

Pasrah sumarah mring Hyang Manon

Kinemulan pangabekti ingkang duk inguni kita ayahi

Dèn padha diéling Adhi

Nganti katekan ing mangsané mangké

Mula saka iku dhuh Adhiku kang tinresnan ing Gusti lan sasami

Jalaran datan ana kang bisa mesthi tumuruning pesthi

Aywa kongsi wedi ing pambudi

Bebarengan ngupadya marganing hayu

Gentur sung bekti pangastuti marang Hyang Widi

Kinanthèn welasing manah mring sasami

Ayo Dhi

Dipadha sumadya

Jatisrono, 1 April 1992

Antonny Gersang