JAKARTA

Èsemu manis butrawali

Agawé sengseming ati

Semu!

Sliramu tansah janji

Bakal tansah awèh rejeki

Jebul uga pati

Wengis!!

Tansah kapolès pasuryanmu

Jinejegaké dedegmu klawan oyod-oyod beton

Kobabar-tumangkaraké kéwan-kéwan waja

Déné atimu

Mundhak dina mundhak candra tan béda

Saya suwé saya atos kadya séla item

Tega mbungkem kang sejatiné padha butuhaké piwelasmu

Apa sira ora lingsem?

Oalaaaaaah...

Jakarta... Jakarta...

Aja manèh kang aran rejeki

Nadyan katresnan baé yo wus dèn rampas

Kekasihing atiku kopikut

Kalimput ing pedhutmu kang peteng ndhedhet

Jakarta

Raupa tirta kang wening

Ngadhepa kaca pangilon

Sawangen githokmu

Leremna kamurkanira

Kang gawé janma tegel mangsa manungsa sapadhaning tumitah

Jakarta, 10 Juni 1992

Antonny Gersang